Kringvarp Føroya og Mentamálaráðið gjørdu fyri ikki so nógvum mánaðum síðani ein nýggjan Public Service sáttmála, har dentur millum annað varð lagdur á at teksta føroyskar sendingar til gagns fyri fólk, ið hava hoyribrek.
Í fleiri ár hevur Meginfelag teirra, ið bera brek í Føroyum arbeitt við at gera hetta til veruleika, eins og ST nevndin í viðmerkingunum til Føroya landsstýri vísir á tørvin, so allir føroyingar verða javnsettir og kunnu fylgja við í tí, sum sent verður.
Á heimasíðu síni skrivar Meginfelag teirra, ið bera brek í Føroyum, at fólk, ið bera brek, ynskja ikki frammíhjárættindi, men somu møguleikar sum øll onnur. Eisini verður skrivað, at eitt samfelag hevur ábyrgd av øllum borgarum. Myndugleikarnir hava økisábyrgd , har mál verða viðgjørd á røttum staði.
Tað hava tey ikki fingið í samfelagskjakinum, sum farið er fram seinastu dagarnar, um dokumentarsendingina Ást fjalir lýti, sum elvdi til nógv kjak millum føroyingar.
-Aftur ein føroysk sending, sum hevur ført til nógv kjak í almennu miðlunum. Og aftur eru fleiri hundrað føroyingar púra útistongdir, tí hvørki er sendingin ella verður sendingin tekstað. Hetta er átaluvert, skrivar Meginfelag teirra, ið bera brek í Føroyum á facebook í gjárkvøldið.
Les eisini: Fleiri hundrað føroyingar púra útistongdir
