Eitt av politisku krepputiltøkunum í ringu tíðunum fyrra partin í 90-unum, vóru karensdagarnir: Skipanin, sum bar í sær, at alment lønt missa løn tveir teir fyrstu sjúkradagarnar. Onnur krepputiltøk vóru m. a. at frítíðin varð stytt, at frítíðarprosentið varð minkað og serliga frítíðarískoytið hjá fastløntum.
Tað er einki dulsmál, at henda skipan hevur sera illa umtókt millum alment lønt. Nú skjýtur Javnaðarflokkurin upp fyri tinginum, at skipanin verður sett úr gildi.
Í tingsetuni 1995 samtykti løgtingið at broyta lógina um frítíð við løn soleiðis, at frítíðin, frítíðarprosentið og serliga frítíðarískoytið nú eru aftur á sama støði, sum var galdandi áðrenn tey almennu krepputiltøkini vórðu sett í verk í 1992 og 1993, sigur Vilhelm Johannesen, sum vegna Javnaðarflokkin legði uppskotið um avtøku av karensdøgunum fram í tinginum í gjár.
Við hesum hevur løgtingið ásannað, at kreppan er við at hæsa av, heldur hann.
Vilhelm Johannesen vísir á, at skipanin við karensdøgum ikki hevur nakrar nevniverdar fíggjarligar avleiðingar fyri tað almenna.
Vit halda, at skipanin hevur óhepna ávirkan á arbeiðsumstøðurnar. Fleiri dømi eru um, at fólk fara sjúk til arbeiðis. Undir slíkum umstøðum eru tey ikki før fyri at gera arbeiðið til lítar. Eisini er vandi fyri, at tey smitta onnur á arbeiðsplássinum. Somuleiðis kunnu vit rokna við, at fólk, sum hava goldið fyri tveir karensdagar, velja at verða heima ivaleysa leingi, soleiðis, at tey sleppa undan at gjalda fyri tveir karensdagar afturat, sigur Vilhelm Johannesen.
Løgtingsmaðurin vísir eisini á, at dømi er um, at stovnur í Føroyum við fastløntum starvsfólkum, við fullari undirtøku frá bæði leiðslu og starvsfólkum, hevur gjørt av, at karensdagaskipanin ikki skal nýtast hjá teimum. Vit vita eisini, at í øðrum londum, eitt nú í Svøríki og í Danmark, har slíkar lógir hava verið í gildi, eru tær settar úr gildi við teirtri grundgeving, at skipanin ikki hevur givið tað ætlaða úrslitið.
At enda sigur Vilhelm Johannesen, at flokkurin í øðrum uppskoti mælir til, at dagpeningalógin verður broytt soleiðis, at tímalønt og onnur, sum í dag fáa sjúkradagpening frá 3. sjúkradegi, skulu fáa henda dagpening frá 1. sjúkradegi.
Við hesum verða fastlønt og tímalønt javnsett, tá talan er um fráveru vegna sjúku, sigur hann.
