Fyri skjótt tveimum árum síðani bað Mordechai Vanunu táverandi norska forsætisráðharran, Kjell Magne Bondevik, hjálpa sær at sleppa úr Ísrael, men hann fekk ikki svar. Nú roynir hann aftur.
Eg heiti inniliga á norsku stjórnina um at verja míni mannarættindi. Tí biðið eg tygum og stjórn tygara gera tykkara til, at ísraelska stjórnin letur meg sleppa av landinum, skrivar Vanunu í einum brævi til Jens Stoltenberg, forsætisráðharra.
Mordechai Vanuno sat í íosraelskum fongsli frá 1986 til 2004, tí hann hevði almannakunngjørt loyniligar upplýsingar um ísraelsku kjarnorkuvápnini. Sjálvt um hann varð latin leysur fyri tveimum árum síðani, hava myndugleikarnir framvegis sera strangt eftirlit við honum. Eitt nú hevur hann fingið forboð fyri at fara úr Ísrael, og hann hevur heldur ikki loyvi at tosa við útlendsk tíðindafólk.
