Fólkaflokkurin og Annika Olsen fóru á val upp á, at hjúnabandslógin ikki skuldi broytast. 9. septembur -valið var 1. septembur- valdi hon tó at stinga í sekkin og meldaði seg úr flokkinum.
17. septembur meldar Annika Olsen seg inn í Framsókn, einasta flokk á tingi, sum er fyri at broyta hjúnabandslógina. Longu 20. septembur meldar hon seg úr flokkinum aftur, og hevur síðani verið uttanflokkatingkvinna.
Í dag, 4. februar, er Annika Olsen so aftur vorðin partur av tingmanning Fólkafloksins. Hvørja støðu hevur hon so til málið um broytingar í hjúnabandslógini í dag?
- Tað fáa vit at síggja, tá atkvøðugreiðsla verður seinni í vár, var svarið frá Anniku Olsen.
Hóast fleiri tíðindafólk strongdu á fyri at fáa eitt greitt svar frá tingkvinnuni, skákaði hon sær undan. Okkurt bendir tó á, at flokkurin hevur broytt støðu í mun til undan løgtingsvalinum.
- Eg gleðist um, at flokkurin letur tingfólkini atkvøða eftir síni sannføring, sigur Annika Olsen, sum vísir á, at flokkurin er ein liberalur flokkur, har frælsi hjá einstaklinginum er í hásæti.
Jørgen Niclasen, formaður floksins, váttaði eisini at tað stóð hvørjum einstøkum tinglimi frítt at atkvøða, sum teimum lysti í etiskum málum.
Tó so, undan valinum, meðan Annika Olsen enn var í Fólkaflokkinum, boðaði flokkurin frá, at hóast tað stóð hvørjum frítt at atkvøða eftir egnari sannføring, so stuðlaði einki valevni floksins broytingum í hjúnabandslógini, og tí stóð Fólkaflokkurin saman í móti at broyta hjúnabandslógina.
24. novembur, tá málið um broytingar í hjúnabandslógini var til 1. viðgerð, boðaði hon frá á tingsins røðarapalli, at hon fór at atkvøða fyri uppskotinum. Tá var hon uttanflokkatingkvinna. So er spurningurin, hvat fólkaflokstingkvinnan Annika Olsen fer at atkvøða.
Í dag vildi hon tó ikki svara.
