- Øll trý sjúkrahúsini eiga sítt natúrliga og avgerandi pláss í samfelagnum, og tað skapar bert ótryggleika og misnøgd at tosa um niðurlagingar og niðurleggingar.
Tað sigur Jógvan Skorheim, borgarstjóri í Klaksvíkar kommunu, í lesarabrævi á in.fo í dag.
Hann sigur, at fasta sambandið hevur ikki tikið grundarlagið undan Klaksvíkar Sjúkrahúsi, men hevur í staðin styrkt grundarlagið og hevur staðfest týdningin, sum sjúkrahúsið hevur fyri føroyska heilsuverkið og samfelagið.
- Tí tykist tað næstan óveruligt, at løgmaður og onnur skilafólk nú aftur eru farin at rópa hart um at sentralisera sjúkrahúsverkið – sjálvandi undir skálkaskjóli av felags leiðslu og størri samskipan av teimum trimum sjúkrahúsunum. Trupulleikin í føroyska sjúkrahúsverkinum er ikki á Tvøroyri ella í Klaksvík, og tað er at hótta vælvirkandi og týdningarmiklan part av føroyska heilsuverkinum at tosa um at niðurlaga tey smáu sjúkrahúsinum, sigur Jógvan Skorheim.
- Tað tænir ongum endamáli og fer bara at koma aftur um brekku, um smærru sjúkrahúsini skulu líða undir, at Landssjúkrahúsið skal hava betur umstøður. Eru trupulleikar í heilsuverkinum, farið so eftir veruligu trupulleikunum og latið verða við at leggja fót fyri væl týdningarmiklar partar av heilsuverkinum úti um landið. Øll trý sjúkrahúsini eiga sítt natúrliga og avgerandi pláss í samfelagnum, og tað skapar bert ótryggleika og misnøgd at tosa um niðurlagingar og niðurleggingar, sigur borgarstjórin og heldur fram:
- Og sokallaðir landspolitikkarar í meginøkinum áttu at havt dirvi til at fyrihildið seg til veruligu trupulleikarnar í samfelagnum – og í heilsuverkinum – heldur enn at billa fólki inn, at fáa teir bara spakan undir smáu sjúkrahúsini og flyta alt til Havnar, so verður alt gott, sigur Jógvan Skorheim.
Les alt lesarabrævið her
