Amerikanski forsetin, George W. Bush, vil hava meiri pengar til at fíggja bardagan ímóti altjóða yvirgangi.
Forsetin sigur, at tað er neyðugt við einari eykajáttan, og hann hevur tí biðið kongressina játta stjórnini 27,1 milliardir dollarar afturat. Pengarnir skulu nýtast til krígsførsluna í Afghanistan og onnur hernaðarlig tiltøk, sum forsetin tekur til. Í umsóknini ger forsetin eisini vart við, at tað er neyðugt, at málið fær skjóta viðgerð, tí tørvur er á pengunum beinanvegin.
Í umsóknini til kongressina sigur Bush, at ætlanin er at nýta ein minni part av pengunum til tiltøk ímóti yvirgangi í sjálvum USA. M. a. er ætlanin at útbyggja trygdarskipanirnar í floghavnunum og at styrkja vaktarhaldið á amerikanska markinum.
