Týski kanslarin, Gerhard Schrøder, stúrir fyri teimum høgu oljuprísunum, og nú vil hann hava tey oljuframleiðandi londini til at økja framleiðsluna fyri at tálma prísunum.
Mánadagin hitti Schrøder forsætisráðharran í Kuwait, Sabah al-Ahmed al-Sabah, og á fundinum bað hann tey oljuframleiðandi londini hava størri ans fyri heimsbúskapinum. Tað var kortini ikki líkt til, at orð hansara ávirkaðu kuwaitiska stjórnarleiðaran, tí hann svaraði, at OPEC-londini fara eftir øllum at døma at halda fram við somu framleiðslu sum nú.
Kuwait hevur í løtuni formansskapin í OPEC. Felagsskapurin fer at halda fund seinni í hesum mánaðinum, men eygleiðarar vænta ikki, at londini fara at økja framleiðsluna fyri at tálma oljuprísunum.
