Bjarni Djurholm hevur nú reist málið um at fáa kinesiskt inn í føroyska fólkaskúlan og miðnámsskúlan.
Formaðurin í mentanarnevndini hjá løgtinginum hevur spurt Bjørn Kalsø, landsstýrismann í mentamálum, um hann er sinnaður at gera kinesiskt mál og kinesiska mentan til vællærugrein í 10. flokki og í miðnámsskúlunum.
Bjarni Djurholm staðfestir, at Kina er næststørsti búskapur í heiminum. Vøksturin er eini 10 prosent um árið, og um fá ár verður kinesiski búskapurin størri enn tann amerikanski.
- At Kina soleiðis er við at gerast búskaparliga lokomotivið í heiminum merkist longu sum er. Flestu ásanna, at í næstum fer búskaparligi kraftmiðdepilin at liggja í fjareystri, og at Kina verður nýggja íløgu- og framleiðslustórveldið, sigur hann.
- Henda gongdin hevur eisini við sær, at neyðugt er hjá okkum í vesturheiminum at ogna okkum innlit og vitan um kinesiska málið og mentanina, skulu vit til fulnar kunna gagnnýta teir møguleikar og klára avbjóðingarnar sum verða orsakaðar av broyttu búskaparjavnvágini.
Grannar bjóða kinesiskt
Bjarni Djurholm sigur, at av somu orsøk eru alsamt fleiri miðnámsskúlar í grannalondunum farnir bjóða kinesiskt sum vallærugrein.
- Endamálið er, at næmingarnir læra at lesa, tosa og skilja nútíðar kinesiskt, kallað putonghua.
Hann sigur, at dentur verður lagdur á lesingina og kynstrið at tosa málið á t.d. B-støði.
Skrivligt er minni parturin, og er mest at rokna sum stuðul undir málsligu innlæringini.
- Harumframt verður undirvíst í kinesiskari mentan og samfelagslæru.
Bjarni Djurholm heldur, at skulu Føroyar verða virknar í alheimsgerðini, eiga vit at læra av samtíðar gongdini og á besta hátt búgva okkum til komandi avbjóðingar og møguleikar.
- Hetta er ikki minst galdandi á skúlaøkinum, har kinesiskt eigur at vera eitt av valfakunum í 10. flokkunum og miðnámsskúlunum framyvir, sigur Bjarni Djurholm.
