Hevur hon sagt, at Posta skal avtakast um partafelag og gerast aftur til almennan stovn?
Kári P. Højgaard, løgtingsmaður, trýr ikki rættiliga upp á tíðindi, hann hevur lisið á info, har Rigmor Dam, landsstýriskvinna í mentamálum er endurgivin fyri at siga, at hon heldur, at Posta átti aftur at verið gjørt til ein almennan stovn.
Tað var í kjalarvørrinum av, at Posta hevur givið bløðunum boð um, at gjaldið fyri útbering hækkar 1. apríl. Rigmor Dam hevur arbeitt við uppskoti um miðlastuðul, sum er á veg til aðru viðgerð Løgtinginum nú, og sum tað tykist vera stórur meiriluti fyri. Fyri bløðini merkir tað, at hesin møguligi stuðul í stóran mun skal berast aftur til landið gjøgnum hækkað útberingargjald til Posta.
Í grein 52 spurninginum, sum Kári P. Højgaard hevur sett landsstýriskvinnuni, spyr hann soleiðis:
– Hevur Rigmor Dam sagt tey orðini, hon verður endurgivin fyri á in.fo 1. mars 2017, at Posta skal avtakast og gerast til ein almennan stovn?
– At hækkanin av kostnaðinum fyri blaðútbering fer avstað við øllum miðlastuðlinum?
– At hetta ikki er í tráð við samgonguskjalið?
– Hvørji ítøkilig stig fer landstýriskvinnan at taka í hesum máli?
Kári P. Højgaard greiðir í viðmerk til fyrispurningin frá, at 1. apríl 1976 varð postverkið yvirtikið sum málsøki og fekk navnið Postverk Føroya.
– Í 2005 bleiv Postverk Føroya umskipað frá almennum stovni til almenna partafelagið Posta. Henda umskipan hevði breiða undirtøku í løgtinginum, har allir teir fýra stóru flokkarnir atkvøddu fyri umskipanini, meðan Sjálvstýri og Miðflokkurin vóru ímóti grundað á, at Postverk Føroya var ein vælvirkandi stovnur við góðari tænastu til allar borgarar í landinum, sigur Kári P. Højgaard, og heldur fram:
– Ivasemi tá var stórt, hvussu ein slík umskipan fór at ávirka stovnin og tænastuna til borgaran kring landið.
– Spurningurin verður settur, tí landstýriskvinnan í mentamálum alment hevur fráboðað, at Posta skal avtakast sum partafelag, og hon ikki vildi svara, tá ófráboðaðir fyri-spurningar vóru á skrá, men bað um at fáa spurningin skrivliga, sigur Kári P. Højgaard.
