Føroyar eru eisini í bólki saman við Litava til komandi Nations League Deild C kapping.
Tað verður 10. og 11. ferðin at vit spæla móti Litava, tí vit hava spælt ímóti teimum heilar níggju ferðir síðani 1998.
Til EM-undankappingina í 2000 vóru vit í undanbólki saman við Litava. Vit megnaðu javnleik 0-0 á útivølli á Zalgiris leikvøllinum í Vilnius. Tá stóð Jákup Mikkelsen ein branddyst í málinum, og heilt móti dystarenda var líka við at Todi Jónsson tryggjaði okkum øll trý stigini.
8. september árið eftir taptu vit 0-1 fyri Litava á Tórsvølli.
Vit vóru aftur í undanbólki saman til undankappingini til EM-endaspælið í 2004. 12. oktober í 2002 vann Litava 2-0 í Kaunas við tveimum málum, ið vóru skotin í fyrra hálvleiki. Árið eftir, 10. september í 2003 vann Litava 3-1 á Svangaskarði. Uggin tann dagin var vakra frísparksmálið Súni Olsen meddaði í málið úr 30 metra fjarstøðu.
Aftur til EM-endaspælið í 2008 vóru vit í undanbólki saman. 7. oktober í 2006 taptu vit 0-1 á Tórsvølli, og 12. september í 2007 vann Litava 2-1 í Kaunas. Tann dagin pyntaði tað væl, at Rógvi Jacobsen minkaði um munin til 2-1 við einum fantastiska vøkrum lobbi tá klokkan vísti 90 minuttir.
Og so vóru vit aftur í undanbólki saman til HM-undankappingini í 2010, og nú bragdaði. 15. september í 2008 vann Litava 1-0 í Kaunas. Árið eftir, 9. september í 2009 brast fyri nev tá vit vunnu 2-1 við málum, ið Súni Olsen og Arnbjørn Hansen skoraðu.
HER ber til at hoyra hæddarpunktini frá frásøgnini hjá Hilmari Jan Hansen og Tróndi Arge á gamla Rás2 frá tí dystinum.
Í fjør, 11. november í 2020 taptu vit 1-2 fyri Litava á LFF leikvøllinum í Vilnius. Litava skoraði bæði málini hjá sær stutt undan steðginum. Gunnar Vatnhamar minkaði um munin heilt móti dystarenda.
(Kelda: Faroesoccer)
HER ber til at síggja hæddarpunktini frá KVF frá 2-1 sigrinum á Litava á Svangaskarði 9. september í 2009:
##med2##
