Klæmint A. Olsen spældi allan dystin, tá Breiðablik spældi javnleik 0-0 móti Keflavík á útivølli í dysti í bestu íslendsku fótbóltsdeildini.
Tá 78 minuttir vóru leiktir fekk Klæmint gyltan møguleika úr stuttari fjarstøðu at leggja Breiðablik á odda 1-0. Men sera óheppið sendir hann bóltin á yvirleggjaran og uppum málið. Vísir tekur rívan til og skrivar, at talan er um aldarinnar "kiks".
HER ber til at síggja risa málmøguleikan hjá Klæminti.
Breiðablik er nummar trý í deildini við 22 stigum, sama stigatali sum Valur.
Valur vann á útivølli 3-2 (0-0) á Víkingi Reykjavík, ið saknaði Gunnar Vatnhamar á vøllinum ígjár. Víkingur er tó fremst í deildini við 27 stigum.
Pætur J. Petersen slapp ikki á vøllin, tá KA á heimavølli vann 4-2 (1-1) á Fram.
KA er nummar fimm í deildini við 14 stigum.
