Tróndur í Gøtu landar í dag 1.050 tons av makreli við sild sum hjáveiðu í Kollafirði. Tróndur í Gøtu hevur verið norðanfyri Føroyar, har teir hava roynt eftir makreli saman við Finnuri Fríða og Jupiter.
Tróndur í Gøtu hevur pumpað fiskin við nýggju pumpuni, sum pumpar makrelin upp úr trolinum, so hvørt sum hann kemur í trolið.
Heimasíðan hjá Varðanum skrivar, at skiparin á Tróndi í Gøtu, Frits Thomsen, letur væl at kvalitetinum, og fiskurin kom sprellandi niður í kølitangarnar.
Heimasíðan skrivar, at støddin var góð okkurt um 400 gram í miðal á makrelinum og um 320 gram í miðal á sildini.
Tróndur í Gøtu var á Kollafirði á midnátt, og tað tekur okkurt um hálvtannað samdøgur at landa skipið.
