Føroya Ríðingarfelag ger vart við, at óviðkomandi fólk mugu halda seg burtur frá ríðibreytini við Marknagil, til heystkappríðingin er av fyrst í september mánaði.
Hallur Hansen, formaður í Føroya Ríðingarfelag, sigur, at ríðingarfelagið hevur einki ímóti, at fólk vanliga nýta ríðibreytina at ganga á, men at hetta kann gerast vandamikið, tá ross og reiðfólk venja og ríða kapp.
- Í ringasta føri kann tað enda galið. Rossini koma við fullari ferð, og um onkur stendur fyri, gera tey eitt hopp til síðuna. Reiðmaðurin, hann rýkur so av rossinum, sigur Hallur, ið leggur aftrat, at higartil hevur tó einki óhapp verið.
- Rossini kunnu renna 500 metrar upp á eini 34 sekund, so tað er rættiliga stór ferð, sum talan er um, sigur hann.
Vanliga verður farið á ríðibreytina í pørum, soleiðis at annar kann standa við endan á ríðibreytini og ansa eftir, at eingin óviðkomandi kemur inn á breytina sjálva.
Fyri tveimum árum síðani vóru nøkur, ið gjørdist ónøgd, tí at atgongdin til ríðibreytina varð avmarkað av somu orsøk. Hallur Hansen vísir tó á, at tað er Føroya Ríðingarfelag, ið hevur goldið fyri ríðibreytina, og sum somuleiðis geldur leigu fyri økið, ið breytin liggur á.
Til heystkappríðingin er av, verða fólk biðin um at ganga fram við breytini og altso ikki koma inn á breytina sjálva.
