"Vónandi er hann skeivt endurgivin. Um ikki, so er hetta heimsmetið í manipulatión og tann størsta lygnin, sum higartil dags er serverað føroyingum".
Tað var ikki hissini, sum løgtingslimurin hjá Tjóðveldisflokkinum, Tórbjørn Jacobsen, legði floksformannin, Høgna Hoydal, undir í lesarabrævi í Sosialinum hósdagin.
Formaður Tjóðveldisfloksins, Høgni Hoydal, ynskir ikki at gera stórvegis viðmerkingar til persónliga álopið frá eysturoyartingmanninum, Tórbirni Jacobsen.
?Øll í flokkinum hava sjálvsagt rætt til at hava sína erligu meining um mín persón og málið, men tá, tú verður ákærdur fyri at siga ósatt, verður talan um ein øðrvísi trupulleika, sigur hann
Høgni Hoydal leggur dent á, at persónligu viðurskiftini millum seg og Tórbjørn verða viðgjørd innanhýsis og ikki í fjølmiðlunum, og tí hevur hann onga viðmerking til málið.
?Hetta verður viðgjørt mann til mann, sigur hann
Formaðurin í Tjóðveldisflokkinum vil, hvørki siga nær flokkurin fer at viðgera støðuna ella um lesarabrævið fer at fáa avleiðingar fyri Tórbjørn Jacobsen í flokkinum.
Spurdur, um útsøgnin hevur skatt umdømið hjá flokkinum, svarar Høgni Hoydal, at tað mugu fólk sjálvi gera sær eina meting um.
Sigur satt
Høgni Hoydal tvíheldur um, at hann ikki hevur sagt ósatt í málinum um skrásetta parlagið. Hann mælir fjølmiðlunum til at eftirkanna málið.
?Talan var um eina yvirtøku, og ikki eina dagføring av eini danskari lóg, og parturin við skrásetta parlagnum var við í pakkanum. Samráðingarnar við danir vóru eisini lidnar, og frágreiðingin til aðalorðaskiftið var eisini á trappuni, sigur Høgni Hoydal.
Formaðurin vísir tí aftur útsøgnini hjá Tórbjørn Jacobsen um, at hann ætlaði at dagføra donsku lóggávuna, sum frammanundan var galdandi á økinum.
