Vestmenningar vóru teir, sum fegnaðust mest, tá ið síðsta skotið var latið av eftir síðsta kappróðurin á hesum sinni. Fyri triðju ferð í ár vóru teir komnir fyrstir á mál. Vestmenningur vann á Sundalagsstevnu í Hvalvík, á Fjarðastevnu í Vestmanna, og nú høvdu teir vunnið ólavsøkuróðurin.
Teir tríggir sigrarnir rukku kortini ikki til at vinna FM heitið, hóast vestmenningar tær fýra ferðirnar, teir ikki hava verið fremstir, hava verið næstfremstir. Um Vestmenningur skuldi havt tryggjað sær FM, so var treytin tann, at eisini Hoyvíkingur endaði frammanfyri Eysturoying á Ólavsøku. Tað gjørdi hann ikki.
Vestmenningar duldu ikki fyri, at sigurin á Ólavsøku kendist sum sera søtur biti, nú tað ikki eydnaðist at vinna FM.
Tað kundi kanska roknast við, at teir á Eysturoyingi hingu við nevinum, tá ið teir aftur komu á dráttin. Sjálvandi harmaðust teir um, at tað ikki eydnaðist teimum at vinna á Ólavsøku, men tað var eingin ivi, um teir skuldu havt tikið ímillum at vinna á Ólavsøku ella at vinna FM.
– Sjálvandi kennist tað sum størsti sigurin at vinna meistaraheitið. Tey, sum kappast, vilja altíð vinna. Nú eru vit meistarar, og vit eru serliga fegnir um, at tað eydnaðist okkum at vinna á Eystanstevnu á Skálafjørðinum, var viðmerkingin á dráttinum til reportaran í fínu beinleiðis kappróðrar sjónvarpssendingini hjá Kringvarpinum.
Havnarbáturin hevur vunnið FM trettan ferðir. Í ár hava Eysturoyingur og Vestmenningur hava ligið stavn um stavn við seks FM heitum í part. Nú er Eysturoyingur lopin ein skut framum argasta kappingarneytan í ár. Ólavsøkuróðurin kundi boðað frá, at vestmenningar aftur næsta ár fara at leggja til brots í tí kappingini.
Og so er eftir at vóna, at uppaftur fleiri fara at bjóða av. Sámal Hansen er júst liðugur við ein nýggjan Havnarbát, sum tað sjálvsagt má roknast við fer at bjóða seg fram, og klaksvíkingar droyma um at taka tráðin uppaftur frá í fjør, tá ið teir vunnu trivaligan ólavsøkusigur og harvið tryggjaðu sær FM heitið.
Um Eysturoyingur fer at royna at verja FM heitið, og um Hoyvíkingur fer at gera enn eina roynd at vinna fyrsta FM heitið í hesi kapping til Argja Róðrarfelag, so fer talan at vera uppaftur fjøltáttaðari og vónandi eins spennandi kapping, sum hon hevur verið tað í ár.
Gongdin í finaluni
Vestmenningur sprakk avstað, og Vestmenningur var fremstur allan teinin. Tá ið bátarnir nærkaðust Molanum legði Eysturoyingur upp á síðuna av Vestmenningi, men so tóku vestmenningar nøkur rimmar tøk, ið legði Vestmenning ein skut framum aftur.
Í endaspurtinum dróg rættuliga saman. Eysturoyingur gekk sera væl á síðstu metrunum, men á málinum var Vestmenningur eitt vet frammanfyri.
Hoyvíkingur hekk væl uppií. At hann var hálva bátslongd aftanfyri Eysturoying bar við sær, at hann ikki fekk ávirkan á, hvør av hinum báðum skuldi vinna FM.
Norðingur bjóðaði seg fram fyri fyrstu ferð í ár, men hann spældi ikki nakran leiklut og endaði væl aftanfyri hinar tríggjar.
1 Vestmenningur 04:03.24
2 Eysturoyingur 04:04.08
3 Hoyvíkingur 04:06.08
4 Norðingur 04:15.01
Endaliga støðan
1 Eysturoyingur (FM vinnari) 46
2 Vestmenningur 45
3 Hoyvíkingur 35
4 Norðingur 4
