Pedagogfelagið øðrumegin, og Fíggjarmálaráðið og Kommunala Arbeiðsgevarafelagið øðrumegin, sita nú og samráðast um at fáa eina enda á verkfallinum hjá pedagogunum. Semingsmaðurin kallaði partarnar til fundar klokkan 10 í morgun, men sambært KvF væntaði hann ikki, at nakað semingsuppskot fór at verða lagt fyri teir á hesum sinni.
Nú nú, klokkan 17 í dag, sigur Terje Sigurðsson, semingsmaður, at partarnir hava sitið og samráðst í allan dag, og teir sita við samráðingarborðið enn. Sostatt er gongd í samráðingunum og semingsmaðurin sigur, at sum tað gongur nú, er ikki ómøguligt, at eitt semingsuppskot verður lagt fyri teir einaferð í hesum umfari.
Men nær tað verður, dugir hann ikki at siga, men hann sigur, at so leingi gongd er í samráðingunum, halda tey á, so tað kann vera at tey verða sitandi í alla nátt og út á dagin í morgin.
Semingsmaðurin tekur tað sum eitt gott tekin, at partarnir framvegis sita saman eftir so nógvar tímar – men tað er eisini ein fortreyt fyri at koma til eina semju, staðfestir hann. Innihaldið í samráðingunum vil hann kortini ikki siga eitt orð um.
