Sjúkrahúsverkið er undir sera stórum trýsti. Og trýstið veksur, nú sjúkrarøktarfrøðingar hava kravt endurgjald fyri hvønn sjúkrarøktarfrøðing, sum fær undantaksloyvi til at arbeiða í verkfallinum.
Í hesum sambandi hevur Felagið Føroyskir Sjúkrarøktarfrøðingar boðað Sjúkrahúsverkinum frá, at øll undantøk, ið verða givin frá klokkan 16 í dag, hava eitt avgjald upp á 200 krónur um tíman fyri hvønn. Soleiðis sum verkfallstøðan er í løtuni, svarar hetta til eina upphædd upp á umleoð 80.000 krónur um dagin, sigur Sjúkrahúsverkið.
Les eisini: Vit hava ráð at vera í verkfalli í fleiri ár
– Sjúkrahúsverkið hevur ikki heimild at gjalda pening fyri verkfallið til felagið sum endurgjald fyri undantøk til akuttu tilbúgvingina. Tískil eru umleið 15 tænastumenn í Sjúkrahúsverkinum kallaðir inn á vakt.
– Hetta er tó als ikki forsvarligt, tí tænastumenninir verða noydd at átaka sær arbeiðið yvir tey einki kenna til. Tískil er lív og heilsa hjá sjúklingum nú sett í váða, og leiðslan í Sjúkrahúsverkinum kann tí als ikki góðtaka, at onki verður gjørt við støðuna, sigur Steinar Eirikstoft, stjóri fyri Sjúkrahúsverkið
Tey heita tístaðiliga á partarnar um at fara aftur til samráðingarborðið og verður tað av ongum, heita tey á politiska myndugleikan um at taka um endan og at gera enda á verkfallinum.
– Tað er óhoyrt fyri eitt framkomið samfelag at enda í slíkari óforsvarligari støðu, sigur hann.– Fyri at núverandi støðan ikki skal endurtaka seg hvørja ferð sáttmálasamráðingar eru, er tað alneyðugt at fáa eina neyðtilbúgving í sáttmálan, soleiðis at Sjúkrahúsverkið, og harvið føroyskir sjúklingar, ikki koma í somu støðu aftur, sigur hann.
