Margarinfabrikkin, ið er fyriskipari av tónleikakappingini Sement, boðar frá, at tiltakið er útsett vegna verkfall
Sum flestum kunnugt fór Pedagogfelagið í verkfall í dag. Øll starvsfólk í Margarinfabrikkini eru limir í felagnum og merkir hetta, at alt virksemi hjá húsinum er lagt niður - eisini fyrireikingarnar til tónleikakappingina Sement, ið skuldi byrja í vikuskiftinum.
-At verkfallið og Sement skuldu renna saman soleiðis er sera óheppið. Men tað merkir ikki, at tiltakið er avlýst. Føroya størsta tónleikakapping verður í ár - spurningurin er bara nær.
So leingi verkfall er, er tiltakið útsett. Hetta merkir, at í núverandi løtu ber ikki til at fastseta nýggj dato á Sement 2012. Fyrireikingarnar verða tiknar upp aftur og almenningurin kunnaður gongdina, tá ið verkfallið er liðugt, siga fyrireikarar í tíðindaskrivi í dag.
