– Hetta gera vit við at tryggja, at tað framhaldandi verður virkaður fiskur í býnum!
Soleiðis siga tey bæði verkafeløgini, Havnar Arbeiðskvinnufelag og Havnar Arbeiðsmannafelag, sum eru farin at savna penging til at fáa latið uppaftur fiskavirkið í býnum.
Feløgin siga, at fyrsta treytin er, at virkið verður rikið á handilsligum grundarlag.
– Okkara sannføring er, at einans rakstur á handilsligum grundalag kann tryggja hesi hundrað arbeiðsplássini, siga feløgini.
Útrokningar, sum eru gjørdar fyri feløgini vísa, hesar 10 milliónir krónurnar fara at føra við sær:
• at umleið 100 arbeiðspláss aftur verða sett á stovn í Havn
• at hetta fer at føra við sær eina árliga lønarútgjalding á umleið kr 32 milliónir
• at lønarútgjaldingarnar fara at føra við sær framhaldandi privatan eftirspurning eftir vørum og tænastum í Havn
• at lønarútgjaldingarnar tí fara at tryggja grundarlagið undir vinnulívinum í Havn
• at árliga úrslitið áðrenn skatt á nýggja virkinum fer at liggja omanfyri kr 5 mió
Feløgini siga, at rávørugrundarlagið undir virkinum verður frystur fiskur umframt feskur fiskur. Væntað verður, at 6.000 tons verða virkað árliga á virkinum. Herumframt verður góðskingarvirkið nýtt til pakking og góðsking av fiski – eisini frá øðrum virkjum í Føroyum.
– Tað er einans virkið í Havn, sum hevur møguleika fyri hesum, siga feløgini, sum leggja dent á, at ein treyt fyri virkseminum er, at Tórshavnar Kommuna keypir bygningin og maskinurnar á Vestaru bryggju.
– Vit vóna, at tú ynskir at hjálpa okkum at tryggja fíggjarliga grundarlagið undir nýggja virkinum, siga Havnar Arbeiðskvinnufelag og Havnar Arbeiðsmannafelag í felags áheitan.
