– Bara tí, at eg eri føroyingur, rokna teir við, at eg veit alt um liðið og kenni hvønn einstakan leikara, flennir Andreas Lava Olsen, sum næstan hevur verið til avhoyringar hvørja venjing, síðani tað gjørdist greitt, at ÍF Føroyar og BK Frem bresta saman í donsku steypakappingini, Ekstra Bladet Cup.
Bæði leikarar og venjari hava spurt seg fyri, og Andreas hevur so roynt at greitt frá tí, hann veit. Flestu av leikarunum kennir hann frá føroysku landskappingini, um ikki persónliga so sum kappingarneytar.
– Men tað er sera ringt at meta um, hvar ÍF Føroyar liggur í mun til Frem. Fyri jól vóru úrslitini einki serligt, men nú eru teir vælkoyrandi og tað er farligt. Tá er ÍF Føroyar eitt sera sterkt lið. Tí havi eg eisini ávarað og sagt, at uppgávan skal stakast í stórum álvara, greiðir Andreas Lava Olsen frá.
Leirvíkingurin dylir tó ikki yvir, at ein sigur er eitt krav.
– Annars sleppa vit ikki víðari í kappingini, tað er so einfalt sum tað. Ikki minst aftaná tapið um vikuskiftið, mugu vit reisa okkum. Í so máta er nógv meira upp á spæl hjá okkum, enn tað er hjá ÍF Føroyum, heldur Andreas Lava Olsen.
– Leikararnir hjá ÍF Føroyum eru kanska eyka motiveraðir eisini, nú tað er Frem, teir møta, har nógvir føroyingar hava spælt. So kunnu teir vísa, at tað ikki er neyðugt at spæla aðrastaðni enn við ÍF Føroyum, sigur Andreas Lava Olsen.
