Bilarnir vóru nógvir uttan fyri fimleikahøllina á Stórheyggi í Havn seinasta fríggjakvøld. Orsøkin var, at Føroya Fimleikasamband skipaði fyri grundskeiði fyri venjarar í amboðsfimleiki.
Fimleikasambandið hevði fingið Svannu Hanusardóttir, cand. scient. í ítrótti, at halda ein fyrilestur við heitinum: Grundreglur í undirvísing -teori og praksis . Eftir ein lítlan steðg greiddi Helgi W. Olsen frá um fimleikaligar grundrørslur, metodikk og grundleggjandi móttøku. Helgi W. Olsen er ein av okkara bestu fimleikarum, og er útbúgvin B. A. í ítrótti.
Luttakaraskarin á skeiðinum var sera breiður. Tilsamans 64 venjarar, fimleikarar og fólkaskúlalærarar vóru við. Feløgini, sum vóru umboðað, eru Flog úr Fuglafirði, Fok úr Gøtu/Leirvík, Havnar Fimleikafelag, Klaksvíkar Fimleikafelag, Ljósið úr Havn, Støkk av Glyvrum og Spírin úr Skopun.
Hetta skeiðið var tað fyrsta í eini røð av skeiðum innan amboðsfimleik. Føroya Fimleikasamband hevur ætlanir um at skipa fyri fleiri skeiðum komandi tíðina fyri at betra um umstøðurnar hjá øllum amboðsfimleikarum, bæði breiddini og elituni, í Føroyum.
