Broytingar eru hendar, framburður er skaptur, og viðurskifti okkara eru betrað, og hetta er hent, meðan vit hava verið undir hesari lóg. Men tíðin broytist, og tað gera vit eisini. Tað at ein lóg er blivin fimti ára gomul og er bygd upp á tey viðurskifti, sum vóru fyrr, ein slík lóg eigur at verða endurskoðað, tað vil ikki siga soleiðis sum serliga sambandsflokkurin vil gera tað til. Okkara flokkur er eingin loysingarflokkur, og tað vita teir, sum royna at órógva veljarar Javnaðarfloksins.
Vit eru ein samríkisflokkur, sum veit, hvat vit hava og vilja fáa við einari framførdari heimastýrislóg, eina framførda lóg í tí anda, sum teir politikarar, ið framdu okkara heimastýrislóg, og sum fyri fimti árum síðan vóru greiðir yvir, at broytingar vóru neyðugar, og úrslitið bleiv so tann skipan, sum vit hava og sum hevur havt stóran týdning fyri okkara framkomna samfelag.
Tað er tað samstarvið, sum okkara flokkur vil varðveita og útbyggja til gagn fyri okkara fólk.
Fyri meg er eingin ivi, vit eru best fyri í einum samstarvi, heldur enn at taka eina loysing, sum ikki hevur nakað boð uppá, hvussu framtíðin skal formast fyri bæði eldri og ikki minni tey, sum skulu taka við og føra okkara samfelag víðari, loysingin hevur einki trygdarnet fyri tilveru føroyinga her á landi. Orð og gylt lyftir metta ongan føroying. Tað er heldur eingin loyna, at tað eru vansar í verandi samstarvi, og tað eru teir vansar, sum Javnaðarflokkurin er førur fyri at loysa. Veruleikin er tann, at Javnaðarflokkurin er tann einasti flokkur, sum hevur eitt boð uppá, hvussu vit skulu skipa okkara viðurskifti á breiðum grundarlag og sum vil gera tað, at samstarvið kann og vil halda fram, og sum umboð Føroya fólk á danska fólkatingi fer flokkur okkara at prógva at viðurskiftini verða endurskoðað, so at javnstøða verður ímillum tey, sum búgva her heima og tey, sum búgva í Danmark. Á tí sosiala økinum eru stórir ójavnar, her fara vit at vísa á hesi viðurskifti og fáa hesi viðurskifti javnstillað.
Tað er brúk fyri einum javnaðarumboði á danska fólkatingi, sum greitt vil tala søk Føroya fólks.
Sverre Midjord
