Hóast tað almenna úrslitið av fólkaatkvøðuni á Krim ikki er komið enn, er veitslurómur nógvastaðni, tí tey Russlands-sinnaðu eru ikki í iva um, hvat úrslitið verður.
Russiska tíðindastovan RIA skrivaði í kvøld, at sambært einari kanning høvdu 93 prosent av veljarunum atkvøtt fyri, at Krim verður partur av Russlandi.
Valnevndin á Krim kunngjørdi í kvøld, at valluttøkan var 83 prosent.
Hvítu Húsini í Washington hava enn eina ferð ávarað um, at tað hrnaðarliga virksemið hjá Russlandi á Krim fer at kosta Russlandi dýrt.
-Altjóða samfelagið kann ikki longur góðtaka, at eitt land yvirtekur øki hjá einum øðrum landi, sigur talsmaðurin hjá Hvítu Húsunum, Jay Carney.
