Bókin »Í kjalarvørrinum á Thunder«, sum Ketil Sæter og Eskil Engdal hava skrivað, er útkomin á føroyskum máli. Bókin er týdd úr norskum máli.
Bókin snýr seg um ránsveiðuna eftir patagoniskum tannfiski í altjóða sjógvi í Suðuríshavinum við Antarktis. Høvuðsleiklutin í bókini hevur »Thunder«, sum er ein fyrrverandi føroyskur trolari, ið varð umbygdur at fiska við gørnum. Talan er um sørvágstrolaran »Vesturvón«, sum varð latin føroysku eigarunum í 1969 og varð seldur úr Føroyum í 1986.
Bókin »Í kjalarvørrinum á Thunder« er slakar 400 síður til longdar, og í bókini verða fleiri ránsveiðiskip tikin fram og viðgjørd. Leitað verður eftir eigarunum av ránsveiðiflotanum, og so at siga allir pílar peika ímóti landspartinum Galicia í Spania, har eitt hugtak er fiskivinnumafia – »La Mafia Gallega«.
Myndugleikar í Noregi, Australia, Nýsælandi, Spania og USA vóru við til at steðga ránsveiðuni, og aðrir felagsskapir høvdu eisini ein leiklut – eitt nú Sea Shepherd.
Jan Erik Simonsen týddi bókina. Forlagið á Merkrunum í Sandavági gevur bókina út.
##med2##
