Komandi tíðina fer køld luft við vátaslettingi og kava at streyma inn yvir Føroyar, fyrst frá landnyrðingi síðani norðri og útnyrðingi.
Í dag verður strúkur í vindi upp í skrið av eystri, 13 til 18 m/s, eitt bil stormur í støðum, 23 m/s, við hørðum hvirlum. Alt døgnið samdrigið og lættari regn-, vátaslettings- ella kavaæl. Hitin úr frostmarkinum upp í 4 hitastig.
Mánadagin strúkur í vindi upp í skrið av landnyrðingi, 13 til 18 m/s, sum snarar í ein norðan. Samdrigið og regn-, vátaslettings- ella kavaæl og hitin millum 1 og 4 stig. Um kvøldið makar hann vindin og um náttina verður stívt andøvsgul upp í hvassan vind av norðri, 10 til 15 m/s. Samdrigið og vátaslettings- ella kavaæl og hitin millum frostmarkið og 3 hitastig.
Týsdagin verður stívt andøvsgul upp í hvassan vind av norðri, 10 til 15 m/s, sum makar niður í gul til stívt andøvsgul, 5 til 10 m/s. Sólglottar, men okkurt regn-, vátaslettings- ella kavaæl og hitin millum 1 og 4 hitastig. Um náttina makar hann vindin enn meiri og verður lot til andøvsgul av norðri, 2 til 7 m/s. Yvirhøvur turt og stundum klárt. Hitin verður millum 3 kuldastig og 3 hitastig.
Mikudagin verður lot til andøvsgul av norðri og útnyrðingi, 3 til 8 m/s, í løtum upp í stívt andøvsgul, 10 m/s. Samdrigið og okkurt kava- ella vátaslettingsæl og hitin millum 3 kuldastig og 3 hitastig.
Hósdagin verður gul til stívt andøvsgul av norðri og útnyrðingi, 5 til 10 m/s, sum øtlar vindin upp í andøvsgul upp í ein strúk, 8 til 13 m/s. Yvihøvur skýggjað og kava-, vátaslettings ella regnæl og hitin úr frostmarkinum upp í 4 hitastig.
Fríggjadagin verður andøvsgul upp í ein strúk av norðri og útnyrðingi, 8 til 13 m/s, sum spakuliga makar nakað. Samdrigið og kava-, vátaslettings ella regnæl og hitin úr frostmarkinum upp í 4 hitastig.
