VB/Sumba tók seinnapartin eitt týðandi fet ímóti Vodafonedeildini, tá liðið á heimavøllinum á Vágseiði vann í málríkum dysti á B68. Hetta var dysturin, sum var útsettur fyri veður næstsíðsta vikuskifti.
Nú øll liðini í 1. deild hjá monnum hava spælt 20 dystir, er VB/Sumba fimm stig framman fyri tey trý næstu, sum eru HB, B71 og TB.
Tá avtornaði, vann VB/Sumba 4-3, eftir at hava verið á odda 3-2 í hálvleikinum, men ta einu løtuna var B68 á odda, umframt at toftamenn tvær ferðir undir dystinum javnaðu, eftir at VB/Sumba var farið framum.
Í fyrra hálvleiki var heimaliðið við yvirlutan, og umframt málini, hevði VB/Sumba eisini skot á yvirliggjaran. Men í seinna hálvleiki legði B68 trýst á vertirnar, men til fánýtis, tí fleiri mál komu ikki.
VB/Sumba-B68 4-3 (3-2)
1-0: Jón Krosslá Poulsen
1-1: Jonleif Højgaard
1-2: Pól Jóhannus Justinussen
2-2: Jón Krosslá Poulsen
3-2: Jón Krosslá Poulsen
3-3: Emil H. Olsen
4-3: Henning Joensen
Støðan: VB/Sumba 40 stig, HB, B71 og TB 35, B68, NSÍ, FC Hoyvík 28, Víkingur 24, Skála 19, MB 8
