Frans pávi, sum var 88 ára gamal, doyði av heilabløðing og eftirfylgjandi hjartasteðgi.
Tað sigur Andrea Arcangeli, lækni í Vatikaninum, í eini deyðsváttan, sum varð almannakunngjørd í kvøld.
Hetta staðfestir fyrrverandi fráboðanir í italskum miðlum, eitt nú blaðnum Corriere della Sera, um at ein heilabløðing var deyðaorsøkin.
Ein heilabløðing er ein blóðtøppur ella bløðing í heilanum.
Pávin var í koma, áðrenn hann doyði.
Hann doyði klokkan 7:35 mánamorgunin, upplýsir Vatikanið.
Júst dagin fyri - páskadag - hevði hann staðið á svalanum við útsýni yvir Pæturstorgið og ynskt góðar páskir á páskamessuni.
Hann sá veikur út og segði bert eina stutta heilsan sjálvur, meðan eitt hjálparfólk las hansara longru og siðbundnu páskaheilsan upp hansara vegna. Aftaná koyrdi pávin eisini runt á torginum í pávabilinum.
Frans pávi fekk álvarsliga sjúku í februar og mars við lívshóttandi lungnabruna. Læknarnir hava eftirfylgjandi staðfest, at hann var sera nær við at doyggja eisini tá.
Á deyðadegnum í dag hava nógvar heiðranir verið til pávan og samkenslu.
Fleiri hava varpað ljós á sosialu átøkini hjá pávanum og fólksligu og jarðbundnu tilgongdina at vera pávi.
Frans pávi staðfestir í sínum testamenti, at hann ynskir at verða jarðaður í kirkjuni Santa Maria Maggiore í Róm og ikki Pæturskirkjuni sum nógvir aðrir pávar.
Í tekstinum stendur, at hann ynskir at verða jarðaður "í jørðina, uttan serligt prýði", men við sínum pávanavni á latíni: Franciscus.
Santa Maria Maggiore er ein av teimum fýra høvuðskirkjunum í Róm. Hon varð stovnað í árinum 432.
Ritzau/Reuters
