RÙSDREKKA
V-dagur er Vargadagur. Nýggja ølin hjá Restorffs bryggjaríi kallast Vargur. Og við henni heldur Restorffs V-dag.
Leingi hevur ein nýggj øl verið í væntu frá Restorffs bryggjarí. Fríggjadagin kom so ølin á marknaðin. Talan er um eina øl við mest loyvdu alkoholstyrki í Føroyum, 5,8%. Navnið á ølini er Vargur, og sambært stjóranum á Restorffs brýtur hendan ølin frá øllum øðrum á føroyska marknaðinum í dag.
?Ølin er bryggjað av Munchener Malti og gevur hetta slagið av malti ølinum ein dimman ravgulan lit. Smakkurin er stórur og kraftmikil ? smakkurin loypir fram sum ein vargur, sigur Johan Mortensen.
Navnið vargur merkir í roynd veru úlvur. Navnið er tikið langt afturi í norðunum gudatrúnni, har sagt varð frá um vargin og í kvæðum frættist eisini um varg. Nú á døgum verður vargur ofta rópt um styggan seyð, men Restorffs hevur hildið tað verið meiri hóskandi at taka eldra heitið.
Um sjálva etikettina er tað at siga, at myndin er av einum norður amerikanskum úlvi, sum hevur fingið onkran nýggjan eginleika í myndaviðgerðini.
Øðrøðrir, sum eisini stendur á etikettini, er ein ketil, har gandaður drykkur av blóði einaferð hevur verið í.
Við ølini fylgir eisini ein bryggjarasøgu, sum tekur lesaran aftur til Norrønu gudalæruna við øllum tí, ið hartil hoyrir.
Sagt verður frá, at drykkurin er skaldadrykkur, og hann ger menn til óður menn, sum renna eftir konufólki.
Fekk hugskot í Svøríki
Johan Mortensen sigur, at hugskotið til nýggju ølina kom á ferð í Svøríki, har hann sá nakrar úlvar í djóragarði.
?Hesir gjørdu eitt ótrúliga stórt inntryk á meg, og harfrá kom hugskotið til hesa ølina. Tað eydnaðist mær at yvirtala Óla Svenn, og nú rokni eg við, at ølin fer at gerast væl umtókt, sigur Johan Mortensen.
Bryggjarin hjá Restorffs, Mortan Mørk, hevur útviklað ølina sjálvur. Ølin lá átta vikur, áðrenn fyri fyrstu ferð týsdagin varð tappað í fløskur.
Við nýggju ølini miðjar Restorffs bryggjarí at vera eina øl frá at verða lidnir við teirra útboð av øli. Hendan næsta ølin skal hava pilsnara styrki, sum er 4,6%.
