Um trý ár skal tað vera liðugt við oljufýring í øllum nýggjum almennum nýbygningum.
Tað sigur Johan Dahl, landsstýrismaður í vinnumálum, sum eisini umsitur orkumál.
Hann vísir á, at vit eru farin undir at leggja um frá olju til varandi orku.
- Men í hesum sambandi eiga vit at seta okkum sum mál, at hereftir verður oljufýring ikki sett í ein tann einasta nýggjan almenna bygning.
Og tá ið hann hugsar um almennar bygningar, meinar hann bæði við bygningar hjá landinum og hjá kommununum.
- Vit eiga at tora at seta okkum sum mál, at um nøkur ár, kanska í 2016, skal eingin nýggjur bygningur verða hitaður við oljufýring.
- Tað eiga vit at klára, sigur Johan Dahl.
- Sethús og størri bygningar brúka 25 prosent av okkara oljunýtslu.
Restina brúka skip og bilar og onnur.
- Tað skal ikki longur bera til at byggja almenn hús og seta oljufýr í tey. Tað má vera eitt krav frá okkum sum almennum myndugleika, at varandi orka skal brúkast í øllum nýggjum almennum og kommunalum bygningum, sigur Johan Dahl.
- Tað púra skeivt og í andsøgn við okkara orkupolitikk. Men tað skal eisini vera eitt krav fyri at vísa í verki, at vit taka okkara egna orkupolitikk í álvara, sigur landsstýrismaðurin.
