Fleiri ferðir hava fjølmiðlarnir víst á trupulleikarnar, sum eru av vantandi opinleika hjá løgregluni í Føroyum.
Enn eitt dømi um hendan vantandi opinleika er í sambandi við málið um horvna Dánjal Petur Hansen í Runavík.
Fjølmiðlarnir eru hepnir at fáa orðið á rætta viðkomandi hjá løgregluni, men samskiftið er alt annað enn gott. Ikki so frægt, at løgreglan hevur skipað fyri tíðindafundi ella sent nakra kunning til miðlarnar.
Hetta málið sær út til at blíva tann fyrsta og størsta morðgátan í Føroyum, og tí átti løgreglan at skipað eina tænastu til fjølmiðlarnir, so rætta kunningin kom út til fólkið alla tíðina.
Hesin vantandi opinleiki hevur eisini við sær, at slatur og sleyg hava frítt at fara, og tað kann bara vera óheppið – bæði fyri tey avvarðandi og fyri málið hjá løgregluni.
– Vælsignaða Karen Marie Olesen: Halt nú títt lyfti og vís hendan opinleika í verki.
