Føroya Pedagogfelag øðrumegin og Fíggjarmálastýrið og kommunurnar hinumegin samráddust framvegis mikudagin á middegi. Partarnir hava verið á Hotel Hafnia síðan mánamorgunin, tá semingsmenninir kallaður partarnar samanaftur.
Jákup í Gerðinum, semingsmaður, segði, at hann væntaði, at partarnir fóru at skriva undir eina semju mikudagin, tá vit høvdu hann í telefonini á middegi mikudagin. Jákup í Gerðinum roynir at finna semju saman við Gloriu Kalsø.
Hann leggur tó dent á, at semja enn ikki er funnin.
? Tað hevur gingið framá í smáum fetum, men enn vantar nakað í, segði Jákup í Gerðinum, sum væntaði at sita nakrar tímar afturat.
Tá allir smálutir eru komnir uppá pláss er bara eftir at fella semjuna niður á pappír, sum partarnir skulu undirskriva.
Vónandi kunnu vit í blaðnum í morgin bera fleiri tíðindi um semjuna, sum semingsmaðurin væntar er komin undir land mikukvøldið.
Pedagogfelagið hevur verið í verkfalli í meira enn tvær vikur, og foreldur eru farin at ótolnast.
