- Tvey línuskip eru undir Íslandi og koma væntandi inn at landa síðst í hesi vikuni. Skipini hava ein blanding av toski, hýsu, brosmu og longu og møguliga eisini nakað av blálongu og kongafiski.
Fiskamarknaður Føroya veit at siga, at streymurin verður harður fyrst í vikuni.
- Tí er væntandi, at fleiri línuskip koma inn at landa í dag.
Lagt verður aftrat, at tvey línuskip eru á Rygginum og fiska tosk, blálongu og svartkalva. Hini línuskipini eru á djúpum vatni og fiska mest brosmu, longu og nakað av toski. Eitt línuskip fiskar tó tosk og hýsu.
Fiskamarknaður Føroya vísir á, at eitt línuskip er í Eysturgrønlandi og fiskar svartkalva, og hetta skipið landar neyvan hesa vikuna.
Væntandi er ikki, at nakar serligur útróður verður hesa vikuna, nú streymurin er harður, og veðurútlitini eru skiftandi.
Partrolararnir, sum allir fiska upsa, hava misjavn, men heldur smáligan fiskiskap. Teir koma inn at landa, sum vikan gongur.
- Tveir djúpvatnstrolarar fiska upsa og ein fiskar svartkalva og annan djúpvatnsfisk. Teir, sum fiska upsa, landa helst síðst í hesi vikuni.
Fiskamarknaður Føroya veit at sita, at restin av djúpvatnstrolarunum antin frysta veiðina umborð ella liggja við bryggju.
