Tað er eingin loyna, at Klaksvíkar Svimjihøll er millum best umtóktu og best vitjaðu støð í allari kommununi og við nýggja vælverudeplinum er tilboðið í svimjihøllini nú vorðið uppaftur betri og fjølbroyttari.
Leiðarin í svimjihøllini, Torkil Mørkøre, sigur, at vælverudepilin hevur verið ein stór succes, og nýggju møguleikarnir í svimjihøllini síggjast eisini aftur í nógv øktum inntøkum, tí tilboðið nú dregur nógv fleiri fólk í høllina.
Leiðarin vísir á, at svimjihøllin í Klaksvík altíð hevur verið væl umtókt, og ein orsøkin er tær dagføringar og nýhugsanir, sum eru framdar gjøgnum árini, seinast við vælverudeplinum.
- Vit síggja javnan nýggj andlit í høllini, og vit eru sera fegin um at kunnu veita tænastu til enn fleiri viðskiftafólk enn áður, sigur hann.
Torkil Mørkøre leggur aftrat, at árið í fjør royndist sera væl, og ein orsøkin til óvanliga nógvu vitjaninar eisini kann hava sína orsøk í, at familjur, sum ikki fóru av landinum vegna koronu, í staðin valdu at stytta sær stundir í Klaksvíkar Svimjihøll.
