Tað er neyvan ov nógv sagt, at tey í Vági kanska hava drúgvastu royndirnar at skipa fyri stórum veitslum fyri ítróttarfólkum. Í øllum førum megnaðu tey enn eina ferð at vísa, at tey duga at skipa fyri, tí alt gekk sum fótur í hosu leygarkvøldið, tá hondbólturin hevði sína árligu gallaveitslu.
Høllin var vakurt pyntað og dekkað upp, undirhaldið koyrdi væl og ikki minst gekk ótruliga skjótt og smidliga við matinum, hóast veitslufólkini vóru yvir 300 í tali. Her var talan um fyrireikingar og avgreiðslu til eitt reint UG!
Nógvir av gestunum komu suður seinnapartin leygardagin, nakrir um morgunin, umframt at onkrir eisini vóru farnir suður fríggjakvøldið. Teir best »fyrireikaðu« veitslugestirnir mundu tó vera nakrir av kollfirðingunum, ið longu hóskvøldið vóru farnir til Vágs, so teir ikki skuldu forsøma nakað…
Sum altíð, so var størsti áhugin fyri, hvørji høvdu fingið heiður og æru eftir ein langan og góðan hondbóltsvetur, og her var talan um bæði teir vanligu heiðrarnar til tey bestu í fleiri bólkum, umframt at landsliðsvenjararnir hjá kvinnum og monnum komu við sínum boði upp á ársins lið.
Adina og Djumic
Ikki óvæntað, so struku føroyameistararnir – bæði kvinnur og menn hjá Neistanum – í posa og sekk, men kortini ikki heilt, tí eisini onnur sluppu upp í part her og har. Hjá kvinnunum vann Tjaldur sum steypavinnari eisini nógv, meðan tað kanska var merkisvert, at Stjørnan, sum bæði í steypa- og landskappingini tapti sínar finalur, stóð eftir við ongum.
Tá tað kom til ársins spælarar, sum er størsti heiðurin av øllum, gjørdist tað hjá kvinnunum Adina Petrea í Tjaldri, sum vann í kapping við Jacklin Durhuus og Barbaru Brauer í Neistanum, og hjá monnunum vann Jugoslav Djumic í Neistanum á liðfelaganum David Edvardsen og Áka G. Olsen í VÍF. Hvørki Adina ella Jugoslav vóru til staðar í Vági leygardagin.
Eftir borðhaldið helt veitslan fram til fram ímóti morgni, og lagið var tað allarbesta frá byrjan til enda. Enn er ikki greitt, hvør vil taka stafettina og skipa fyri næsta ár, men uttan iva fer onkur at halda seg framat, tá avtornar, tí henda gallaveitslan er hin best passandi endin á langa hondbóltsvetrinum.
