EUROPA CUP FÓTBÓLTUR
Jóannes Hansen
VB vann mikukvøldið føroyskum fótbólti eitt stig í Europa Cup fótbólti. Tað er at frøðast um, tí tað er ein veruleiki, at hetta er ikki nakað, sum kemur fyri á hvørjum ári. Í fjør spældu føroysk feløg seks Europa Cup dystir og tveir Intertoto Cup dystir. Føroyingar taptu allar dystirnar, og málmunurin var 1?25!
Í ár tykist ganga eitt vet betur. Í Intertoto Cup megnaði B68 2?4 á heimavølli og málleysan javnleik í Lokeren í Belgia. Og mikukvøldið megnaði VB málleysan javnleik.
Rættur hugburður
Vágbingar fóru undir altjóða uppgávuna við røttum hugburði. Eftir at fyrsti fjálturin var runnin av, var einki at rafla um. Teir taklaðu, so tað sang eftir í, og sjálvt um fremmanda menninir høvdu bóltin nógv, og nógv gekk fyri seg á VB hálvuni, so megnaðu VB menninir at halda mótstøðumonnunum frá at koma til upplagdar málmøguleikar.
Í framrættaða spælinum var ikki tann tyngdin í, sum er neyðug, um hóttanin ímóti mótstøðumálinum skal vera støðug. Robert Cieslewic og Birgir Jørgensen vóru rættuliga einsamallir frammi á vøllinum. Miðvallararnir lógu ofta aftarlaga, og tá álopsmenninir fingu tak á onkrari av longu sendingunum, vóru teir ofta noyddir at bíða eina løtu, áðrenn viðspælararnir komu framvið.
Í síðunum vóru Palli Augustinussen og Jón Pauli Olsen góðir bóltspælarar, og onkra ferðina megnaðu vágbingar at leggja bóltar innfyri, men tá var tað, tí álopsmenninir báðir hjálptu til í borðunum, og tískil spurdist einki burturúr.
Tríggjar ferðir var um reppið, at VB fekk mál. Tá tað restaðu fimm minuttir av fyrra umfarinum fangaði Palli Augustinussen tvær ferðir bóltin, tá mótstøðumenninir vóru á veg í álop. Fyrru ferðina royndi Palli sjálvur við skoti úr fimtan metrum, men málverjin tveitti seg og bjargaði til horna. Seinnu ferðina spældi Palli til Birgir Jørgensen, sum var leysur mitt fyri. Málverjin hálvbjargaði, og Robert Cieslewic var akkurát ov seinur til returbóltin.
Tá tað leið fram ímóti dystarenda, og vágbingar ? væl uppmuntraðir av hugagóðu áskoðarunum úr Vági ? stríddust fyri lívinum, var um reppið, at teir skoraðu. Jón Gærdbo, sum var sera raskur í miðverjuni, sendi fríspark fram í brotsteigin. Birgir Jørgensen stútaði upp á tvørs, og úr seytjan metrum heilfluktaði Tórður Holm dygst omanfyri málið.
Lítið vandamiklir
Slavia Mozyr var væl betri fótbóltseind við denti á spælinum, enn vágbingar vóru tað. Tveir metra maðurin á sentrala miðvøllinum, Alexandar Pantic, var saman við aftasta verjumanninum og liðformanninum Oleg Samatov, sum ofta flutti seg fram, við í nógvum eitt tvey samanspæli, og teir royndu nógv við krossrenningum og yvirlappi, men teir vóru ikki serliga vandamiklir. Ofta spældu teir mitt fram eftir, og tað høvdu vágbingar avgjørt einki ímóti, tí miðverjan stóð væl. Gjøgnumbrotini í síðunum vóru fá ? eisini tí, at vágbingar dugdu væl at skerma av ? og harvið vóru vandamiklu innleggini ikki so nógv.
Slavia Mozyr fekk eina rúgvu av hornaspørkum, men teir fingu einki burturúr teimum. Onkra ferðina royndu teir við langskotum, men tey flestu vóru óneyv og fóru omanfyri málið. Og tá teir endiliga raktu á málið, vardi Bjarni Johansen væl.
Undan dystinum nevndu vit, at álopsmaðurin Roman Vasiliuta var sera vandamikil. Landsliðsmaðurin, sum fyri stuttum skoraði sigursmálið í 2?1 sigrinum á Noreg, var ikki við í Føroyum. Hann er ikki væl í øgn við felagið, og hann er settur á sølulistan. Um hann verður á liðnum komandi mikukvøld var ikki greitt, tá fremmanda menninir fóru úr Gundadali.
Framtíðin
Stóri spurningurin hjá VB og føroyskum fótbólti er nú, hvussu tað fer at hilnast komandi mikukvøld. Hitastigini í Hvítarusslandi liggja omanfyri tey 30, og VB skal ferðast leingi. Teir fara úr Føroyum sunnumorgunin og fara beinleiðis víðari til Warzawa.
Hagani skulu teir seinni sunnudagin við bussi teir 650 kilometrarnar til Mozyr. Tann teinin eiga teir at megna, soleiðis at teir eru á staðnum tíðliga mánamorgunin. Men ein óvissur er við í spælinum. Tað er bíðitíðin við markið. Bíðirøðin sigst vera ógvuliga long á markinum ímillum Pólland og Hvítarussland. Vit mugu vóna, at hon ikki fer at ganga útyvir VB ferðalagið og harvið fyritreytirnar at standa seg hampuliga í nógva summarhitanum og undir fremmandu umstøðunum.
Mikukvøldið gav VB (alt ov fáu) føroysku fótbóltsáskoðarunum eina góða løtu í Gundadali. Tær hava ikki verið so nógvar í Europa Cup høpi, og tí var tað hugaligt. Góða eydnu í Hvítarusslandi!
