Nú um vikuskiftið fáa suðuroyingar eitt gylt høvi til at sleppa av við barnaklæðir, leikur og barnaútgerð, tey ikki brúka og at útvega børnunum nýggj klæði, nýggjar leikur og barnútgerð ? og tað er púra ókeypis. Fríggjakvøldið frá klokkan 20-21, ber nevniliga til hjá fólki at koma í Framtíðina við klæðum, leikum og barnaútgerð annars, sum bara liggur til húsaskorð og sum tey vilja sleppa av við.
Og leygardagin frá klokkan 10 til 16 eru øll vælkomin í Framtíðina bæði við klæðum, leikum og barnaútgerð og at fáa sær tað heim aftur við, sum tey hava hug til.
Hetta sama tiltakið var í fjør og tað eydnaðis so mikið væl, at tað verður roynt aftur nú.
- Klædnaídnaðurin hevur víst seg at dálka illa og at brúka alskyns evnafrøðilig evni í framleiðsluni, sigur Sirið Stenberg, sum er við í bólkinum.
- Tá ið klæðini eru vaskað nakrar ferðir, eru nógv av evnunum vaskað úr teimum og tey vera tí bæði betri at vera í og betri fyri heilsuna.
Hon heldur, at hugburðurin at brúka og blaka burtur, er alt annað enn umhvørvisvinarligur og hartil er hann dýrur.
- Við at endurnýta, eru vit eisini við til at hjálpa hvør øðrum og kunnu læra at fegnast um at onnur fáa gleði av tí sum vit ikki hava tørv á. Og hinvegin kunnu vit eisini gleðast um at fáa tað vit sjálvi hava tørv á, sigur hon.
