Fíggjarlóg
Borgarstjórin í Vági hevur ikki mist vónina um, at Vágs havn verður útbygd, hóast landsstýrismaðurin við vinnumálum sigur, at pengarnir eru fluttir til skúlabygging í Vági.
?Tað hevur als einki við hvørt annað at gera, vísir Jógvan Krosslá, borgarstjóri, á. Bæði málini eru lógarfest. Miðnámsskúlin er eitt landsmál, og havnina hevur Løgtingið eisini samtykt at gera, so har man fara at koma ein loysn, sum vit kunnu góðtaka, hevur hann álit á.
Hann sigur seg havi skilt, at átta milliónir vóru ávegis til Vágs havn, men at tær síðan vórðu tiknar aftur. At tær skulu vera farnar til skúlabygging, ljóðar í hansara oyrum eitt sindur løgið, heldur borgarstjórin.
Hann setir sítt álit á, at Løgtingið fer at taka undir við uppskotinum hjá Henriki Old og Johan Dahl, soleiðis at havnin kann verða bygd út.
?Tað er ikki Vágs Býráð, sum hevur biðið um samferðsluhavn her suðuri. Tað er komið aðrastaðni frá, vísir Jógvan Krosslá á. Men saman við samferðsluhavnini má ídnaðarhavnin eisini gerast, sigur hann.
Hann sigur, at bæði tingmenn og landsstýrismenn hava alla tíðina verið positivir, tá vágbingar hava tosað um havnarútbygging. Ikki minst, tá teir fyri stuttum vitjaðu í Suðuroy. Tí væntar hann ikki, at málið fer at steðga upp nú.
Men at blanda havn og skúla saman, vil hann ikki góðtaka. Nú er skúlamálið so mikið gaamalt, at tað skal loysast, uttan at tað gongur út yvir nakað annað virksemi í kommununi, sigur borgarstjórin í Vági.
