Upptakt
Runavíkingar hava lítið annað enn æruni at spæla fyri, tá teir sunnudagin taka ímóti VB. Hinvegin hevur tað áður víst seg, at júst í hesari støðu eru runavíkingar vandamiklastir, og millum annað mundu teir oyðilagt bronsuvónirnar hjá KÍ, tá liðini dystaðust.
Kári undir knívin
Tí er tað helst eisini við góðum vónum, at teir fara í holt við dystin móti VB, og tað er helst eisini ein eyka motivatiónsfaktor, at talan er um verandi meistararnar.
Rúnavíkingar hava so at siga alt fólkið tókt, sum fyri hálvari aðru viku síðani var við at fáa málleysan javnleik í Havnini. Einasta undantak er Kári Hansen, sum hevur ein skaða í knænum, og í løtuni bíðar eftir eftir at verða skurðviðgjørdur. Áki L. Hansen hevur ofta verið á beinkinum, og kom eisini á vøllin móti HB, men hann hevur eisini onkran skaða at dragast við.
Dánjal Hansen, sum hevur verið lítið at sæð á besta liðnum seinastu dystirnar, hevur tvey vikuskifti upp í slag spælt við aðru deild, og møguliga er hann nú somikið væl fyri, at talan aftur verður um fótbólt í fremstu røð.
Uttan Zivkovic
Vágbingar, ið sum nevnt framvegis kunnu rópa seg føroyameistarar, hava við einari einstakari broyting sama fólkið, sum megnaði at vinna sær eitt stig í Gøtu. Hesa ferð er eitt stig tó helst ikki nóg mikið hjá VB, tí skulu teir gera sær nakrar vónir um heiðursmerki, er helst neyðugt við fullari úrtøku komandi dystirnar, meðan teir so mugu vóna, at B68 snávar onkra staðni á vegnum. Har afturat kann fjórða plássið geva Inter-Toto bólt, so vágbingar hava alla orsøk at stríðast.
Einasta fráveran er Predrag Zivkovic, sum hevur leikbann, meðan fleiri av hinum leikarunum, sum annars hava drigist við smáskaðar, nú hava havt tvær vikur at koma fyri seg, og tí allir eru til reiðar at tørna út aftur.
