Landsdystur
Stutt undan fráferðini hjá fótbóltslandsliðnum til Skotlands gjørdist greitt, at ein broyting verður í mun til upprunaliga úttikna hópin.
Jóhannis Joensen fekk skaða í knæið, tá FS Vágar um vikuskiftið spældi ímóti B68, og hesin tykist darva somikið nógv, at hann ikki fær verið við á ferðini.
Ístaðin hevur Henrik Larsten tikið ein annan vágamann í hópin. Tað er Tór-Ingar Akselsen, sum eisini var við í hópinum móti Íslandi. Enn hevur Tór-Ingar fyrsta »veruliga« landsdystin til góðar, men sum spæl hansara hevur verið fyri HB í ár, so er einki at ivast í, at hesin fer at koma hampuliga skjótt.
