Hóast VÍF bara var á odda við tveimum málum í hálvleikinum, so var ongantíð veruligur vandi á ferð hjá føroyameistarunum. Teir hildu seg frammanfyri Tjaldur alla tíðina, og í seinna hálvleiki øktu teir støðugt um leiðsluna.
Tjaldur møtti við átta spælarum, og tað var bara ein ov nógv fyri at manna liðið á vøllinum. Hetta hevði ivaleyst við sær, at tað gjørdist strævið hjá runavíkingum at fylgja við, og í seinna hálvleiki dragnaðu teiri eisini.
VÍF gjørdi ikki nógv hóvasták burtur úr í fyrra hálvleiki. Teir høvdu í løtum trupulleikar við at spæla seg gjøgnum verjuna hjá Tjaldri, men teir høvdu allatíðina munin í dystinum.
Tryggur sigur
Í seinna hálvleiki gjørdust umstøðurnar at spæla betri. Tað gjørdist longri millum málini hjá Tjaldur, samstundis sum verjan hjá runavíkingum var tagað alt meira sundur.
Ingi Olsen var sentralur á VÍF-liðnum, og hann bæði skoraði og spældi viðspælarar leysar. Og við góðum stuðli frá spælarum sum Sámal Joensen, Harald Bjørgvin og Áka Olsen var sigurin tryggur.
Tjaldur hevur framvegis fyrsta stigið til góðar í hesum kappingarárinum, meðan VÍF hevur vunnið allar sínar dystir.
Dysturin í tølum:
VÍF-Tjaldur 27-18 (11-9)
Málskjúttar:
VÍF: Ingi Olsen 9, Sámal Joensen 5 (1), Harald Bjørgvin 4, Áki Olsen 3 (1), Ragnar Zachariasen 2, Agnar Joensen 2, Daniel Rapa 1, Rógvi Nielsen 1.
Tjaldur: Dragica Stojovic 7, Mortan Hansen 4 (1), Sverri Justinussen 4 (1), Zoran Sarcevic 1, Arnfinn Langgaard 1, Dia Lamhauge 1.
Brotskøst: VÍF 2, Tjaldur 6
Útvísingar. VÍF 4, Tjaldur 3
Dómarar: Kristian Johansen og Pole Hansen
