Grækaris Djurhuus Magnussen
Sambært seinastu hagtølunum hjá Hagstovu Føroya vaksa útreiðslurnar í almennu fyrisitingini við nógvari ferð. Støðan er tann sama á heilsu- og almannaøkinum. Eisini har hækka útreiðslurnar skjótt.
Fyrstu fýra mánaðirnar í ár eru útreiðslurnar í almennu fyrisitingini hækkaðar við 8 prosentum, ella 14 milliónum krónum. Fyrstu fýra mánaðirnar í fjør vóru útreiðslurnar í almennu fyrisitingini 178 milliónir krónur, og í ár er hetta talið so komið upp á 192 milliónir krónur.
Í almennu fyrisitingina verður roknað við kommununum, statinum (prestar, dómsvald o.l.), og síðani tær útreiðslur, ið fara umvegis Føroya Gjaldstovu (m.a. miðfyrisitingin).
Í alt fjør vóru útreiðslur í almennu fyrisitingini 548 milliónir krónur. Verður gongdin tann sama, tað sum eftir er av hesum árinum, sum fyrstu fýra mánaðirnar í ár, fara samlaðu útreiðslurnar í 1997 at liggja um 590 milliónir krónur, ella slakar 600 milliónir krónur.
Almannaverkið hækkað 11%
Í heilsu- og almannaverkinum er gongdin á leið tann sama, sum í almennu fyrisitingini. Fyrstu fýra mánaðirnar í ár hækkaðu útreiðslurnar við 11 prosentum, ella 16 milliónum krónum. Samlaðu útreiðslurnar hetta tíðarskeiðið vóru 156 milliónir krónur.
Í fjør vóru útreiðslurnar í heilsu- og almannaverkinum 140 milliónir krónur fyrstu fýra mánaðirnar.
