Tað var tvær ferðir Wambach, og nú stendur USA í HM-finaluni fyri kvinnur í fótbólti, sum er í Týsklandi í hesum døgum.
Í fjórðingsfinaluni móti Brasilia stóð annars á gomlum nøglum. Eftir at vera komið fram um 1-0 beinanvegin í dystinum, fekk USA eitt ivasamt brotsspark móti sær og ein leikara útvístan. Men tað var ikki nóg mikið við tí. Eftir at Hope Solo í USA-málinum hevði tikið brotssparkið frá Christiane, dømdi dómarin umspark, nakað, sum eingin annar á stadion ella við sjónvarpsskíggjarnar skiltu.
Martha heimsins besti kvinnuligi fótbóltspælari skoraði síðani við sínum skoti.
Hetta tók dystin til eyka tíð, og hendan var ikki meiri enn byrjað, tá Martha aftur skoraði. Og so sá svart út fyri USA, eitt mál aftan fyri og ein leikara færri. Men tveir minuttir inn í yvirtíðina av eykatíðini setti Abby Wambach høvdið á eitt innlegg, og so endaði alt við brotssparkskapping, sum USA vann 5-4, og harvið dystin 7-6.
Í hálvfinaluni var næstan sama søgan. USA kom tíðliga á odda, men við einum undarligum innleggi í seinna hálvleiki javnaði Frakland.
Men so traðkaði Wambach aftur í karakter, og 10 minuttir undan leikloki setti hon aftur høvdið á, hesaferð eitt hornaspark, og so stóð 2-1. Stutt eftir skoraði Morgan eftir skjótálop til endaliga úrslitið 3-1.
Og USA skal møta Japan í finaluni. Sviar vóru annars ógvuliga spentir og eisini eitt sindur sigursvístir undan dystinum, og tað sá eisini gott út, tá Josefine Öqvist gjørdi sær dælt av einum mistaki í japansku verjuni og legði Svøríki á odda í 15. minutti.
Men so var eisini alt sagt um innsatsin hjá Svøríki í dystinum. Tí meðan hann enn eina løtu var javnur, tók Japan so líðandi yvir, og við einum eitt sindur hepnum máli javnaði Kawasumi (ella var tað eitt Öqvist sjálvmál?).
Eftir hetta stóð Japan á øllum dystinum, og til tíðir var tað næstan komiskt at síggja svensku leikararnar senda avleveringar avstað, sum vóru á lægri støði enn hjá einum føroyskum undir 14 gentuliði.
Tað segði seg tí sjálvt, at tað kundi bara verða ein vinnari, og við málum frá liðskiparanum Sawa og enn einum frá Kawasumi spældi Japan seg í finaluna móti USA, sum verður spæld sunnudagin.
