Manchester United er nú aftur sjey stig framman fyri Chelsea og Liverpool, eftir at dystir eru spælir bæði í gjárkvøldið og fyrrakvøldið. United hevur enntá spælt ein dyst færri enn nærmastu kappingarneytarnir.
Manchester United vann 2-1 á Newcastle á St. James Park í Newcastle. Danski Peter Løvenkrands legði The Toon Army á odda, tá níggju minuttir vóru spældir, eftir at van der Sar gjørdi ein brølara, men longu 10 minuttir seinni javnaði Wayne Rooney til 1-1. Tíðliga í seinna hálvleiki gjørdist Dimitar Berbatov match-vinnari, tá hann skoraði til 2-1 til Manchester United.
Aston Villa misti tvey týdningarmikil stig í kappingini um at enda millum fýra tey ovastu liðini í Premier League. Aston Villa tapti 0-2 ímóti Manchester City á útivølli.
Á White Hart Lane var frøin stór, tá Robbie Keane legði Tottenham á odda 1-0 ímóti Middlesbrough. Bæði Keane og Spurs høvdu hart brúk fyri tí málinum, og var endin, at Tottenham vann heili 4-0.
Tey næstu vunnu
Chelsea heldur góða formin undir nýggja venjaranum, Guus Hiddink. Suðuri í Portsmouth í fyrrakvøldið tryggjaði Didier Drogba enn eina ferð London-liðnum øll trý stigini. Sigursmálið fall, tá 11 minuttir vóru eftir av vanligu leiktíðini.
Liverpool kom á slóðina aftur, og kom tað óivað serliga væl við hjá venjaranum, Rafael Benitez, sum hevur kent eitt stórt trýst á sær síðstu vikurnar. Liverpool vann 2-0 á Sunderland. David N’Gog setti Liverpool á sigurskós, tíðliga í seinna hálvleiki, og løtu seinni staðfesti Yossi Benayoun sigurin.
Danski framherjin hjá Arsenal, Nicklas Bendtner, hevur verið ein tann mest útskeldaði fótbóltsspælarin í Onglandi síðstu vikurnar. Bendtner hevur brent illa, men í fyrrakvøldið var danska kanónin innstillað, tí hann skoraði tvey mál í 3-1 sigrinum hjá Arsenal ímóti West Bromwich á The Hawthorns-leikvøllinum í Birmingham.
