Í gjárkvøldið varð herverk framt á ein løgreglubil á Sandi, har allir rútarnir uttan forrúturin vórðu knústir.
Tað upplýsti vakthavandi á løgreglustøðini í Havn í dag fyri in.fo.
Lagt varð aftrat, at herverkið er farið fram eftir klokkan 19 í gjárkvøldið, tá bilurin stóð uttan fyri politistøðina á Sandi.
Í kvøld sigur vakthavandi á løgreglustøðini í Havn, at tveir ungir menn, 16-17 ára gamlir, eru avhoyrdir í samband við herverkið.
Spurdur, um ungu menninir hava játtað seg sekar, sigur vakthavandi, at tað hava teir partvís gjørt.
Løgreglan er tí sannførd um, at tey hava fatur í teimum, sum framdu herverkið á løgreglubilin á Sandi.
