Fólkaheilsuráðið hevur greinað tølini um matvanar hjá føroyingum úr stóru fólkaheilsukanningini frá 2019 “Hvussu hevur tú tað?”, har heili 3000 vaksnir føroyingar tóku lut.
Í kanningini verður spurt, um fólk drekka orkudrykkir.
93,5 prosent av teimum spurdu svaraðu, at tey ongantíð ella sjáldan drekka orkudrykkir.
1 prosent segði seg drekka orkudrykk dagliga, 2,3 prosent søgdu, at tey drekka orkudrykk 1-4 ferðir um vikuna.
Tá ið hugt nærri eftir, hvørjir aldursbólkar drekka orkudrykkir, vísir tað seg, at tað eru serliga menn í aldrinum 18-29 ár, sum drekka orkudrykkir. 6 prosent av teimum drekka orkudrykk dagliga, imeðan 16 prosent drekka orkudrykk 1-4 ferðir um vikuna. Kvinnurnar í sama aldri drekka munandi minni av orkudrykki.
