Klaksvíkar Býráð gevur nú teimum ungu eitt sjáldsamt høvi at fáa ávirkan og at fáa innlit í, hvussu mannagongdirnar eru í einum fólkaræði.
Ætlanin er nevniliga at skipa fyri einum ungdóms-býráðið í Klaksvík, har 10 ung fáa høvi at royna seg sum býráðspolitikarar í ein dag.
Hendan næsta tíðin skal brúkast til at leggja til rættist og at útgreina, hvussu hetta skal skipast, sigur Jóhan Lützen, býráðslimur og formaður í Trivnaðarnevndini, børn og ung.
Tað er ikki greitt, nær tað verður, men hest einaferð í september.
Enn er ikki greitt, hvussu tað verður skipað. Í hesum sambandi skal støða takast til, hvussu teir 10 limirnir í ungdóms-býráðnum, skulu finnast.
- Vit ætla, at talan skal vera um ung, sum ikki hava valaldur og ungdóms-býráðið skal heldur ikki mannast eftir politiskum liti.
Í Klaksvíkar Býráð eru 11 limir, men seinastu limurin í ungdóms-býráðnum verður sjálvur borgarstjórin, Jógvan Skorheim, sum eisini verður formaður fyri ungdóms-býráðið.
Annars hevur ungdóms-býráðið umsitingina hjá býráðnum til taks og skrivarin í býráðnum verður eisini skrivari í ungdóms-býráðnum.
Ætlanin er, at skúlarnir so brúka nakrar dagar at gera nøkur uppskot, sum hava við ungdómsviðurskifti at gera, og sum síðani verða løgd fyri ungdóms-býráðið. Uppskotini verða síðani viðgjørd í býráðnum, akkurát, sum tey verða viðgjørd í býráðnum annars.
- Tað, sum ungdómsbýráðið samtykkir, verður síðani lagt fyri Trivnaðarnevndina, børn og ung við tí endamáli at seta tað í verk, í tann mun tað ber til, sigur Jóhann Lützen.
|
