Eftir niðurflytingina síðsta heyst legði TB í dag fyri í næstbestu deildini. Málið er við Gilla Rólantsson Sørensen á liðnum aftur at finna pláss í bestu deildini.
Í dag vóru teir næstbestu hjá Víkingi gestir við Stórá, og gestirnir eru á veg til hús við øllum trimum stigunum. Víkingur vann 3-2 eftir hálvleiksstøðuna 1-0 til Víking.
Tá ið 2. hálvleikur var eitt korter gamal, og støðan framvegis var 1-0, sá málverjin hjá Víkingi Hans Jákup Arngrímsson beinleiðis reytt kort, og fimm minuttir seinni javnaði miðvallarin Markus Thorberg til 1-1.
Men hóast teir vóru undirmannaðir, so megnaðu víkingarnir at vinna.
Sjey minuttir undan steðginum átti Signar á Brúnni uppleggið, tá ið Jákup Martin Jarnskor legði Víking á odda 1-0. Í gjár var Signar á Brúnni á beinkinum í Sørvági, tí Ari Olsen sær út til at hava vunnið kappingina um plássið á høgra vongverja. Í dag átti Signar bæði uppleggið til fyrsta og næsta málið hjá Víkingi. Tað var 20 minuttir undan leikloki, at Rani Hansen skoraði til 2-1. Hann er aftur í Víkingi, eftir at hann í fjør spældi við EB/Streymi.
Tveir minuttir seinni svaraði TB aftur, tá ið 17 ára gamli Torkil Úlvur Jespersen Holm javnaði til 2-2. Hetta var fyrsta málið hjá honum fyri besta TB liðið.
Og so var tað, at 18 ára gamli Sigmund Hansen á Líðarenda seks minuttir undan leikloki skoraði 3-2 sigursmálið fyri Víking. Uppleggið átti Fann hard Skoradal.
Longu mikudagin fer Víkingur at spæla grannauppgerð, tá ið NSÍ kemur á vitjan.
TB fer leygardagin at spæla í Klaksvík.
