KLOAKKARBEIÐI: Forkvinnan í teknisku nevnd, Marin Katrina Frýdal, tendraði fyri pumpustøðini, sum var endaliga staðfestingin av, at Tórshavnar kommuna hevur rokkið málinum, ið var sett fyri mongum árum síðani, at fáa Vestaruvág reina.
Síðsti parturin av hesum stórarbeiði hevur gingið fyri seg á Skálatrøð, millum Torgið við Nólsoyar Páll og Bøgøtu og síðani fram við Rættará. Sostatt er langt um leingi komið á mál við arbeiðinum, ið varð sett í gongd afturi í 1996 og sum ymsir arbeiðstakarar hava tikið sær av. Saman við teknisku deild hjá kommununi hevur p/f Martin Leo verið ráðgevi og havt eftirlit við arbeiðinum.
Nú komið er mál við hesum partinum, eru tó framvegis stórar avbjóðingar fyri framman, og kommunan fer framhaldandi at virka fyri at betra um umhvørvið. Næsta innsatsøki verður at fáa betri skil á øll útlopini í kommununi, umframt at skifta út aðrar størri og smærri kloakkleiðingar út ymsastaðni í kommununi.
Soleiðis hevur verið arbeitt
• 1996: Partar av óskipaðu kloakkleiðingunum á økinum við Vesturkirkjuna oman ímóti V. U Hammershaimbsgøtu lagdar.
• 2002: Fyrsta projektætlan at umleggja allar kloakkleiðingar undir hugtakinum “Reinskan av Vestaruvág”.
• 2003: Høvuðskloakkleiðing løgd frá økinum á Rasmusarbrúgv við Skinnarasker umvegis undir Bryggjubakka og Mylnugøtu niðan á Vaglið. Síðani varð bundið í Havnará. Kloakkarbeiði í Sigmundargøtu.
• 2004: Kloakkarbeiði í Grím Kambansgøtu.
• 2005: Høvuðskloakkleiðing løgd frá Steinatúni og úteftir móti J. Paturssonargøtu, niðan til Dalavegin.
• 2006: Høvuðskloakkleiðing løgd eftir J. Paturssonargøtu, frá Dalavegnum og út til Torfinsgøtu. Kloakkarbeiði gjørt í V. U. Hammershaimbsgøtu/ Grím Kambansgøtu.
• 2008: Pumpubrunnur lagdur á Skálatrøð, niðan fyri Smiðjuna í Lítluvík. Kloakk- og pumpuleiðing løgd heim í Vágsbotn.
• 2009: Kloakkleiðing løgd frá Rættará til pumpubrunnin við Bøgøtu og niðjasta part av Rættará. Pumpubrunnur settur upp Müllers Pakkhús.
