Tað gav jú at bíta hjá Kára á Rógvi, tá hann kallaði Lars Løkke Rasmussen eitt »R«-hol. Nú er Tórbjørn Jacobsen altíð illur við onkran, og konspiratiónsteoriirnar hjá honum eru ikki altíð so líka til.
Men eyðvitað hevur tað sviðið fast hjá honum, at Sjúrður Skaale er valdur á fólkating.
Tjóðveldi misti fólkatingsessin hesaferð.
Men tað sum kanska hevur sviðið enn fastari hjá Tórbjørn Jacobsen er kanska, at tjóðveldisveljarar so slett ikki vilja hava Tórbjørn Jacobsen á fólkating. Hann fekk bara 142 atkvøður.
At tað so eru fýra kvinnur í Tjóðveldinum umframt Høgna Hoydal, sum hava nógv meira upp á seg enn Tórbjørn Jacobsen, fær kanska mannin at síggja reytt: Bjørt Samuelsen, Annita á Fríðriksmørk, Gunnvør Balle og Óluvá Klettskarð fingu allar fleiri atkvøður enn Tórbjørn Jacobsen.
Barbie-dukkur ella ikki. Vit halda allar hesar fýra tjóðveldiskvinnurnar vera góð og virðilig umboð, sum ikki bara stoya og larma og seta seg sjálvan í fokus allatíðina. Slíkum kunnu menn læra av. Eisini primitivir menn...
