Ukrainski forsetin, Volodymyr Zelenskyj, viðurkendi í dag, at Ukraina verður ongantíð limur í Nato.
- Ukraina er ikki limur í Nato. Vit skilja tað. Vit hava í fleiri ár fingið at vita, at dyrnar standa opnar, men vit hava eisini hoyrt, at vit kunnu ikki gerast limir.
Ukrainski forsetin segði á einum video-fundi við hernaðarligar leiðarar, at hetta er ein ásannan, sum má viðurkennast.
Eitt av krøvunum, sum Russland hevur sett yvirfyri Ukraina, er, at landið ongantíð verður limur í Nato.
Men, bæði Ukraina og Nato hava higartil víst russiska kravinum aftur.
Nato-aðalskrivarin, Jens Stoltenberg, hevur fleiri ferðir sagt, at dyrnar til limaskap í verjusamgonguni standa opnar.
- Tað eigur at vera upp til hvørt einstakt land sjálvt at gera av, hvønn verjufelagsskap landið ynskir at verða partur av, hevur Nato-aðalskrivarin sagt.
Tað er tíðindastovan NTB, sum ber hesi tíðindi í kvøld.
